【專家分析】港股12月繼續升?
【分析】 2022/11/30 11:41
【Now財經台】恒生指數今個月暫時累升約24%,跑贏全球主要市場,噚日係期指結算日,恒指更衝破18000點關口,收市可以企穩喺18000點樓上,呢浸升浪可唔可以延續至12月?
艾德金融期貨部主管文錦輝指,一般而言,環球股市喺11至12月走勢偏旺,而美股喺10月亦破咗「股災月魔咒」,相信12月會繼續造好,有利港股升勢。
Felix又提及,港股噚日走勢同10月期結日升勢類似,恒指10月累升逾3000點,即使打個折扣,11月埋單或累升約2000點,而未升足嘅幅度會喺12月繼續。
展望12月,佢預期恒指突破18400點,即100天線後,仍有1000點上升空間,而大市喺聖誕節前1周左右,市況就會轉為淡靜。
此外,MSCI各指數及恒指將會喺下星期一(12月5日)換馬,Felix話,資金亦會相應調整部署,有機會買高咗及支持恒指向上。
文錦輝 艾德證券期貨投資策略總監 |