【專家分析】鮑威爾再「變鷹」機會微
【分析】 2023/02/07 11:36
【Now財經台】市場憂慮聯儲局繼續收緊貨幣政策,加息周期會比預期長,美股3大指數持續偏向下,美國就業數據強勁,市場關注聽日凌晨聯儲局主席鮑威爾嘅講話,會唔會因強勁嘅就業數據變返鷹?加息幅度會唔會再擴大?
高富金融集團投資總監梁偉民指,鮑威爾應該唔會「太鷹」,過去1年,美國就業數據持續強勁,聯儲局連續兩次議息都收窄加息幅度,反映息口已去到令局方滿意嘅水平,足以遏制通脹,因此,唔會因為短暫嘅數據再擴大加息幅度。
Wyman又提醒,由於聯儲局加息路線圖受通脹數據左右,因此,要留意月中出爐嘅消費者物價指數(CPI)走勢,佢認為,依家唯一變數係加息次數,但相信加幅仍然係0.25厘或0.5厘,對整體大局影響唔大,加上近排經濟數據強,美股喺現水平有回調亦唔出奇。
梁偉民 高富金融集團投資總監 |