【FINTERVIEW】騰訊今「派股」！美團要靠北水撐價？

【Now財經台】騰訊控股(00700)及美團(03690)喺噚日升市功臣，兩隻股份今朝走勢各異，除咗美團今日收市後會出業績，亦係另一個「大日子」，就係騰訊實物分派美團作為特別息，騰訊小股東今日收到美團「碎股」後，會唔會導致美團有好大沽壓？其中似乎幾等錢使嘅騰訊南非大股東Naspers會唔會沽埋一份？

招銀國際證券股票部執行董事蘇沛豐估計，Naspers應該會再部署減持，但會唔會等到個價再靚啲先沽貨就唔知，Naspers連持貨咁多年嘅騰訊都照沽，更何況再間接一啲嘅美團，一旦Naspers減持呢批獲分派嘅股份，一定會令美團股價受壓。

佢又話，睇返騰訊上次分派京東集團(09618)，京東股價喺分派後頭20日跑輸科指及其他主要科網股，但當時北水係買唔到京東，但北水依家係可以買到美團，可能會對美團股價有支持，加上科網股處於復甦階段，估計美團情況會比當日嘅京東好。