【Now財經台】截至早上11時止，1小時內《彭博》用戶關注度上升最多港股，依次為康希諾生物(06185)、旭輝控股集團(00884)、中國信達(01359)、小米集團(01810)、中國恒大(03333)。
康希諾今日一度升逾20%，高見85.5元，因為公司旗下腺病毒載體新冠疫苗「克威莎」獲世衛(WHO)列入緊急使用清單，意味疫苗將會獲更多國家承認，而集團亦喺上海研發緊mRNA新冠疫苗，收入前景似乎幾樂觀？
大華繼顯執行董事梁偉源指，康希諾股價今年已累跌60%，市場似乎唔再熱衷炒疫苗消息，亦對於「克威莎」帶來嘅銷量及收入抱懷疑態度，股價由去年底開始一路跌，期間唔少投資者未等到見到疫苗發展有好消息已離場，不過，國際對mRNA疫苗嘅信心及需求都好大，如果mRNA疫苗有新進展，應該有利集團發展。
