【Now財經台】康希諾生物(06185)開市前有兩手大手上板，以每股70.5元成交，涉及943萬股，成交價較上日收市價78元折讓近10％，似乎係有股東減持。康希諾今朝低開逾7.6%後，跌幅一度擴大至逾9%，低見70.95元。
雖然康希諾上周五宣布公司研製嘅新冠疫苗克威莎，已正式通過世衛(WHO)緊急使用認證，股價當日一度飆20%，但估唔到即刻有股東減持，似乎唔係特別睇好WHO呢單消息。
雖然康希諾第1季業績扭虧為盈，但睇返公司股價，現價已較去年初高位450元，大幅回落超過80%，跌到約2年低位，但喺70蚊水平似乎有啲支持，但投資者信心似乎仍然都係比較薄弱。
