【Now財經台】美國通脹衝上逾40年高位，市場對聯儲局今個星期大幅加息0.75厘嘅預期，最新急升至超過90%，加息一向利好銀行股，本地銀行股今日都有得升，其中以中銀香港(02388)表現最搶鏡，午後衝破30元關口，一度升超過5%，恒生銀行(00011)亦升約2%，滙豐控股(00005)都升到1%。
股評人李偉傑指，主要視乎大市嘅穩定度，之前港股衝上22000點水平，當時銀行股都冇跟住上，而近幾日銀行股跟住大市落返去，今日又跟住個市彈，如果美國今個星期真係加息0.75厘，市場會憧憬息差可能會郁，尤其係最優惠利率(P)，呢個期望會快咗及高咗，到底加0.5厘或0.75厘仲未揭盅，但最少喺整個加息路徑下，本地銀行股係可以受惠到，但其實銀行股一直跑贏，只係近排冇跟足，今日就一口氣追返呢段升幅。
