【Now財經台】中電控股(00002)噚日發盈警，其實集團喺2019年6月都曾經發過盈警，同樣受澳洲業務拖累，發盈警後，股價由81元水平，一路跌到8月底低位約70元，累跌近14%，中電股價今日跌約7%，如果歷史重演，係咪意味股價仲未跌夠？
獨立股評人譚智樂認為，好難評估中電股價跌夠未，反而焦點唔應落再放喺盈警，因為呢啲供應企業未來係面對好大挑戰，因為環球經濟步伐會轉慢，甚至有衰退風險，呢啲電企喺未來社會發電量方面，未必可以有一個穩定表現，過往資金買呢啲股份，只係諗住穩穩陣陣收息，問題係依家經濟前景太唔明朗，市場選擇risk on時，好大機會是優先拋售呢啲股份。
佢又話，點解澳洲業務搞到咁複雜，原因係當地政策唔容許佢哋完全地對沖電價，當源材料如煤炭價格大升，都未必可以轉嫁出去，今次發盈警只係一個觸發點，令本身想沽貨嘅投資者更決斷。
