【Now財經台】內房今日繼續狂飆，本地地產股方面，新世界發展(00017)升得幾靚，上周五同今日都跟隨大市裂口升，但仲未上到50天線，收市報20.65元，升近10%，全日成交金額逾5.7億元。
新世界今日大升可能同新世界喺內地業務多，算係半隻內房股，加上股價低殘有關，集團股價9月中之後好似食咗瀉藥咁，一度低見15.36元，RSI更跌至15嘅非常超賣水平。
不過，新世界都唔係冇壞消息，11月只過咗一半，已經錄得9宗買家「棄船」個案，而去年8月至今累計錄得約319宗同類取消交易個案，佔已出售單位總數約38%，加上公司負債喺同業中屬高水平，加息對公司嘅影響都好大，後市要留意股價有冇力再衝50天線，如果收復唔到，走勢難言好轉。
