【Now財經台】雲音樂(09899)今朝高開近11%後，升幅一度擴大至逾35%，高見84.8元，之後升幅顯著收窄。雲音樂今日大升，可能係同業騰訊音樂(01698)噚日交咗份靚成績表，帶動股價今日爆升，雲音樂都跟炒。
睇返技術走勢，今日喺成交配合下，突破100天線，但股價衝高後升幅收窄，做出一條相當長嘅上影線，反映喺高位冇承接。
雲音樂下個月就上市滿1年，上月底因大市氣氛差，拖累股價創上市新低50.65元，較招股價205元，「潛水」76%，雲音樂股價近半年一直受制於90元水平，幾次突破後都企唔穩，後市要留意業績表現之餘，亦要睇下會唔會又係只炒作一兩日，因為雲音樂已有前科。
