【now.com財經】今朝喺呢度無出到貨，作戰室反而出咗淡倉博指數高開低走，見到戰友都有正數落袋，下半場預計保歷加通道只係Keep住窄幅橫行的話，隨時又係等收市。
依家1點7分，下半場開市之後見目前保歷加頂至底線高度只有146點，指數咬住中軸附近喺「上升通道」&「下降通道」之間來來回回，呢啲位出貨真係同賭大細無分別，多一事不如少一事。
指數未有嘢玩，向個股埋手，噚日中午恒指忽然發力，皆因廣州率先宣布「解封啦！」今日再睇番啲內需股，都真係隨住恒指向上而全線造好，安踏(02020)、李寧(02331)、海底撈(06862)、蒙牛(02319)等都見上行，只係暫時見有美中不足嘅係呢堆個股唔係同恒指一樣高開低收，就係見長長上影線，作勢行「射擊之星」高位轉勢樣，No good。
冷冷地睇到隻申洲國際(02313)走勢尚算不錯，未見高開低走+上影線啲肉酸嘢，日線圖「圓底」向上抽高破頸線+企咗上100天線以上水平。保歷加通道整條呈上都唔會博佢再起勢咁Chur高，但念在Slow STC(14,3)兩線向上仲未正式踩入超買位，暗示仲有空間可以再上。
唔貪心的話，由8月中至8月底嗰段期間畫到嘅「長方形」再拉線，「長方形」底線同150天線相近，呢個位做短期上望目標真係唔算過份，隨時聽日再造多次今日咁上下高嘅陽燭就已經一步到位。
再狼死啲，日線圖見兩個裂口出現，開始有少少符合「裂口理論」嘅情況，只係有少少唔符合嘅係裂口1去裂口2時係用「圓底」去經過，而唔係「上升通道」，所以呢個位要扣少少分。
申洲喺輪場上算是冷門相關資產，喺無乜發行商肯出佢嘅輪之下，目前最貼價嗰隻Call同現價有逾40%價外距離，係絕對不適合使用。所以呢隻嘢Mark住喺正股List度先，依家1點25分，小時圖喺高位作勢出「十字星」，回落唔緊要，重緊要係落到10小時線(小時圖10線)有支持就得啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
