【Now財經台】截至早上11時止，1小時內《彭博》用戶關注度上升最多港股，騰訊控股(00700)、碧桂園(02007)、金沙中國(01928)、永利澳門(01128)、龍湖地產(00960)。
農曆新年澳門人頭湧湧，今日有兩隻賭股上榜，據澳門旅遊局數據顯示，除夕至年初一，4日合共有24萬旅客入境，日均達6萬人，按年飆2.8倍，不過，金沙及永利股價今日急回，分別跌5%及7%，回調幅度係咪合理？點睇賭股前境？
富昌證券聯席董事譚朗蔚指，今次回調係可以預見，又指復常概念股之中，最唔信賭股，雖然股價由舊年11月低位彈咗1倍，但睇返每個月嘅賭收，根本未明顯改善，加上澳門人流多唔代表賭收會增加，因為遊客要入賭場，仲要輸錢先對賭收有貢獻，加上喺12月及1月兩次升浪中，賭股RSI及成交量同升幅「背馳」，而去年11月、12月時，金沙喺20天線、即28.2元水平有支持，距離現價28.9元都唔遠，其實好易失守。
Stevan又認為，復常概念股短線可以靠憧憬炒起，但長遠要睇行業數據及個別企業有冇增長，一旦驗證唔到，沽壓會更加大。佢又提醒投資者要留意2月初公布嘅賭收數據，同埋金沙守唔守得住20天線。
