【Now財經台】花旗集團估計，本地銀行同業淨息差(NIM)，有機會喺舊年第4季已經見頂，因為舊年第4季銀行同業間嘅高息「搶錢戰」轉趨激烈，活期同儲蓄存款顯著減少，加上調高最優惠利率(P)，花旗估計，P每升25個基點，恒生銀行(00011)及中銀香港(02388)淨息差將分別跌4個及1個基點，本地銀行股淨息差係咪已經見頂？淨息差逐步收窄對邊啲銀行股較有利？
元宇證券投資總監林嘉麒指，當外圍仲加緊息，銀行舊年已諗計吸存款，導致息差優勢唔會太大，而息差有時都要睇基本面，舊年底為跑數谷貸款需求，依家外圍息差同香港進一步擴闊，由於經濟啱啱開始復甦，暫時未知貸款需求有幾大，如果今年復甦需求大，銀行股唔使太擔心息差急速收窄，相信第1及第2季都可以維持喺較高水平。
KK又話，若息口闊啲、整體需求大，對大型銀行較有利，相反，小型銀行要提升競爭力，息率回報要細啲先可以做到個量。
