【Now財經台】光伏股新特能源(01799)今朝高開1%後，升幅不斷擴大，早上11點後不斷刷新日內高位，一度升近11%，高見18.86元，成交股數較過去100日同時段平均增加5倍。
新特股價今日被掃高，相信同憧憬北水加倉有關，上交所及深交所上周五公布，港股通北水可買賣股份調整名單3月13日生效，新特連同歐舒丹(00973)合共32隻港股，將會喺當日正式納入「深港通」。不過，面對內地多晶硅今年產能大增導致供過於求，新特前景都有好大隱憂。
新特今日借納入港股通消息，成功收復10天線，並重上所有移動平均線，喺大成交下，上試去年9月中大跌以來形成嘅阻力，即19元整數關口，去年11月及12月挑戰呢個水平都失敗，相信係有一定阻力。
