【Now財經台】恒指午後又刷新今年低位，下跌股份增至逾1300隻，瑞銀將瑞信170億美元嘅AT1債「清零」，市場憂慮會波及埋亞洲銀行，因為唔少亞洲銀行都持有其他銀行發行嘅AT1債，AT1債價急挫或令銀行面臨集資危機，因此，避險情緒帶動金價上升，金股逆市向上。
其中，招金礦業(01818)午後一度高見10.76元，衝上逾兩年高位，招金股價今年一直受制10元呢個阻力，今日成功突破，相信係受金價破位帶動，現貨金價午後曾高見每盎司1993美元，紐約期金亦轉升，再刷新年內高位之餘，仲企穩2000美元樓上。
招金周五會出去年業績，相比同業，集團對金價敏感度較高，依家有一半收入係來自金礦業務，因而成為資金避風港。
