【Now財經台】中國恒大(03333)爆煲引發內房危機後，房企都仲喺度「吊命」，未來嘅政策主調係咪都係「國進民退」，出現更多國企併購？內房陸續派成績表，有國企背景嘅表現相對較好，例如越秀地產(00123)錄得增長，但民營房企如雅居樂集團(03383)、佳兆業集團(01638)都發咗盈警，預告勁蝕過百億元，點解民企內房表現咁差？依家係咪唔好沾手內房股？
廣東省地產商會副會長尹德輝指，針對內房問題，官方文件冇提及「國進民退」，但外界從行為會聯想到上世紀80、90年代嘅國企併購潮，例如有爛尾樓最後都係由「國家隊」接手。
佢建議，如果想買內房股，可以揀表現穩陣嘅越地或華潤置地(01109)，有恒大做先例，就唔好揀「發得大」嘅房企，例如喺海外大幅舉債嘅佳兆業、雅居樂及世茂集團(00813)，因為呢批係最傷嘅房企。此外，亦可以揀喺一線城市或大灣區有發展項目嘅內房股。
