【now.com財經】今日繼續出淡倉，再換上再貼價啲嘅恒指熊(64687)，仍然以小時圖唔過10線為理出貨，所以同樣用返呢條線做量度線。
由於今朝係等住10點，喺小時圖上再生多一粒燭出嚟睇返10小時線到底有幾強，所以今朝Patreon出文時間都準時10點正出動，如常的on top用10分鐘時間作為睇文的話，即10點10分再睇返恒指小時圖，10小時線仍然成為阻力；與此同時亦於五分鐘圖上見指數已經喺偏高水平磨完一輪，五分鐘圖100線幾次都衝唔過之後向下再回，Slow STC(14,3)亦都見兩線向下，符合咗出淡倉嘅走勢，(64687)可以出場。由10點10分起計同以10分鐘作為買貨時間的話，即至10點20分，(64687)期內高低位做過0.074元/0.062元，平均買入價即為0.068元。
落場後，五分鐘圖見保歷加通道整條開始趨向下行，而指數亦於中軸至底線作Swing Trade下行；換上小時圖亦見指數至中午收市前都未上破返條10小時線。作戰室其實同步於10點開出淡倉，中途有戰友收割(咁可能係人哋之後有嘢要做，睇唔到市啦，率先收割得到正數完全無問題)，但相信更多嘅係仲將隻淡倉Hold喺手，博下半場返嚟指數仍然低走於10小時線。
仲有7分鐘開下半場，望望今日半日成交得491億到，都真係戥港交所(00388)陰功。而上個星期三(5月24日)都喺呢度捉過港交所出嚟，仲揀咗隻熊證(62350)，喺呢個專欄裡面計已經即日食咗餬架啦，不過原來仲有戰友揸住。而今早喺YT節目上都有提多次(62350)，但由於港交所實在太爭氣，令到隻(62350)變得愈嚟愈遠，槓桿愈嚟愈細，先行收割，再換第二隻貼價熊再追落去，一來保住咗第一份熊證為你帶嚟嘅盈利先，二來你可以用呢份盈利嘅當中一部份再駁落去，touch wood輸晒都無事架，因為你已經take咗profit 啦嘛，只係take少咗啫，呢個玩法我習慣做「放風箏」，由得佢飛，飛到咁上下再割亦可；斷線都唔怕。
下半場開市，比較見到嘅係喺小時圖上暫時指數出咗「平底」，又10小時線同現價距離有啲遠，風箏注當然可以繼續用10小時線作為量度線啦；但如果數夠格仔要搵位即走嘅，五分鐘圖保歷加中軸仍然可以做量度線嘅，自己數格仔啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
作戰室七日免費試用：https://www.patreon.com/cbbcwar
