【Now財經台】據《彭博》上周報道，內地正考慮減免個人投資者炒港股嘅股息稅，依家內地投資者經港股通買港股，收取嘅股息紅利須繳交20%所得稅。如果政策真係利好港股，最受惠係咪高息中資股？房地產投資信託基金(REITs)稍後會加入互聯互通，本港REITs派息率穩定，係咪都可以受惠？
安泓投資總監兼香港大學房地產及建設系客席副教授楊書健指，市場認為中資股會率先受惠，尤其每月計嘅高息榜股份，大部分派息達10厘或以上，相當吸引，但本地REITs及收租股，包括領展房產基金(00823)、置富產業信託(00778)及九龍倉置業(01997)等，派息率都唔差，因為市場暫時仍預期本港樓市將持續偏弱，假設本港樓價持續下滑，每股資產淨值(NAV)就會跌，而租金跌就會拖低盈利及派息，不過，如果有北水流入，地產股都係唔錯嘅選擇。
不過，Victor又話，比較其他高派息嘅板塊，例如公用股等，由於業務分散各地，相對房託更有優勢，而REITs及收租股之中，只有領展有較多澳洲及英國物業，相對比其他REITs，受惠程度會更大，始終唔需要完全依賴本港樓市，但整體嚟講，有北水流入係好事，不過，如果北水想分散風險，都會揀公用股唔揀REITs。
