【Now財經台】截至早上11時止，1小時內《彭博》用戶搜尋量最多港股，依次為中國神華(01088)、萬科企業(02202)、中國鋁業(02600)、中廣核電力(01816)及瑞安房地產(00272)。
神華發盈警，預期上半年最多少賺13.8%，主要受煤價下跌拖累，以及水力發電令燃煤機組利用時數下跌，雖然按年賺少咗，但對比去年下半年其實有改善，神華股價今日(10日)下跌，係擔心新能源影響火電需求？還是睇淡盈利前景？
資深證券分析師彭偉新指，新能源好難取替火力發電，睇返內地發電總量比例，火電佔逾70%，加上水力發電、太陽能及風力發電都唔穩定，所以火力發電未來幾年仍然扮演一個重要角色，唔會因單月數據而睇淡火電整體發展前景。
Castor又話，過去幾年，煤炭價格自高位回落後已相對穩定，只要煤炭價格不再回升，電力需求維持現時穩定水平，整體電力股喺現有盈利基礎下，股價應該唔會大跌。佢又指，神華今次發盈警，主要係過去1年雨水充足，水力發電嘅發電量增加，但只係季節性影響，所以唔需要太擔心神華表現。
股價方面，佢建議有貨投資者可先行獲利，因股價已失守短期支持位，即50天線水平，相對強弱指數(RSI)自5月10日見頂後，一頂低過一頂，回調壓力唔細，佢估計，神華再跌多約2元，以現價計，即32元水平，之後就會回穩。
