【Now財經台】市傳蘋果公司(Apple Inc.)擬加碼投資印尼，以換取解除iPhone禁售令，刺激Apple股價昨晚(4日)破頂，帶挈港股嘅手機設備股今日(5日)炒上，其中，比亞迪電子(00285)一度升逾5%，但估值仍然偏低，市盈率(PE)約20倍，未來仲有冇追落後空間？
艾德金融執行董事陳政深指，比電仍有追落後空間，呢浸升幅唔及其他同業升得咁急，相信市場之後會再搵理由炒作，如無意外，估值會係其中一個炒作原因，不過，比電主要做手機零部件，技術門檻相對低，令盈利空間擠壓得比較犀利，導致估值咁平。
Ryan又話，估值平亦反映喺公司盈利能力，比電純利率僅2%，即公司要賺錢唔易，比較PE後，既然跟同類股分差唔多，喺呢個情況下，建議投資者直接揀Apple，始終比電定單係來自Apple，供應商又係Apple自己揀，相對估值亦唔貴。
