【Now財經台】港股昨日(12日)反彈逾200點後，今日(13日)又跌過，恒生指數一度瀉近400點，低見20003點，勉強頂住20000關，不過，「盲盒股」泡泡瑪特(POP MART)(09992)冧市照升，股價今朝一度觸及95元，距離「紅底股」又行前一步。
雖然已去到年底，但泡泡瑪特繼續大玩「飢餓行銷」，近排旗下「吸金王」Labubu又有限度供應，Fans又可以上網搶，但只係幾分鐘又掃晒。此外，有玩具店預告Labubu同可樂cross over嘅公仔就快上架。泡泡瑪特趁年底傳統銷售旺季衝刺，相信要交一份非常靚仔嘅業績都冇難度。
銷售成績咁好，泡泡瑪特股價亦升得靚，今年由約20元起步，升到今朝即市高位95元，已累升超過3.7倍，2024年仲剩返嘅交易日唔多，但睇泡泡瑪特嘅走勢，好有機會今年收爐時可以見100元。
