【Now財經台】市場一直睇到實嘅巨無霸新股，內地電動車電池製造商龍頭寧德時代嚟香港上市再有新進展。
據《彭博》引述消息人士指，集團最快今個月或3月初會交上市申請，之前有道指，寧德時代集資額可能超過50億美元，折合約390億港元，如果以呢個規模計，係繼2021年快手(01024)之後，集資最多嘅新股。
由於唔少銀行都希望搶到寧德時代呢單大deal，所以公司只提供0.2%嘅承銷費，再加可能會提供嘅激勵費用，其實承銷費低過1%係好少見。之前據英國《金融時報》報道，中金及中信建投為咗攞到呢單大deal，不惜「頂爛市」，自願收集資額0.01%作為承銷費。
