【Now財經台】截至早上11時止，過去1小時內《彭博》用戶搜尋量最多港股，依次為比亞迪股份(01211)、吉利汽車(00175)、蜜雪集團(02097)、希慎興業(00014)及周大福(01929)。
比亞迪宣布折讓配股，集資逾430億元，股價今早(4日)一度大跌8%，低見334元，失守335.2元配售價，中午收市報339.6元，跌6.6%，比亞迪股價後市會點行？
富途證券首席分析師譚智樂認為，雖然今次配股折讓較大，同埋係突如其來，但其實睇返整個電動車行業發展，的確需要大量資金去營運，由於今次配股規模較大，所以折讓空間較大亦係合理。
佢又話，比亞迪股價仍守到配股價，反映市場冇太大負面反應，雖然港股仍處於急升後調整格局，但由於比亞迪基本面較好，所以問題唔大。
