【now.com財經】HKTVmall母公司香港科技探索(01137)今日(20日)開股東會，股價今日反覆偏軟，變動唔大，收市跌唔夠1%。
本港零售業愈來愈難做，HKTVmall都唔例外，創辦人王維基都話「好難做」兼「危危乎」，所以公司會大量投資非零售嘅生意，希望可以打破困局。
由於生意難做，令市場有好多「諗法」，包括公司會唔會私有化離場、賣盤等，但公司話冇傾過相關嘅事項，直指唔賣盤、唔私有化等，暫時亦唔會再縮門店，亦唔會做外賣生意。
雖然喺香港做生意唔容易，但王維基指，會抱住希望去做，又以學生考試作比喻「以前老師教入到試場，就算試題好難都要繼續考，所以我哋仍會好努力咁做」。
