【Now財經台】中國新零售供應鏈(03928)今日(11日)復牌，萬疆資本擬以逾2.2億元，向中國新零售供應鏈大股東購75%股權，集團本身係做建築工程，而新主就有從事內房業務，會唔會有合作憧憬？
《香港股票財技密碼》作者梁杰文指，萬疆由內房新城控股創辦人及前董事長王振華嘅女兒全資擁有，而王振華係新城發展(01030)最終控制人，而集團都係做內房，將來可能會有工程及裝修業務，可以畀中國新零售供應鏈做，有可能帶動公司營業額或盈利。
Ｍike續指，如果投資者唔介意股價波動，或者相信新城呢個大靠山，可以考慮做中長線部署，相信股價係有機會向上，但仍要視乎新城發展會唔會注資畀中國新零售供應鏈做。
