【Now財經台】截至早上11時止，過去1小時內《彭博》用戶搜尋量最多港股，依次為京東健康(06618)、阿里健康(00241)、建設銀行(00939)、耀才證券金融(01428)及吉利汽車(00175)。
耀才股價今早(15日)一度急瀉逾26%，中午收市前跌幅顯著收窄。據《華爾街日報》報道，阿里巴巴(09988)旗下螞蟻集團收購耀才呢單交易惹起內地監管機構關注，收購可能要推遲，主要關注螞蟻喺未有金融控股公司牌照下收購耀才，可能會引發更多監管問題。螞蟻之前煞停上市，今次收購又遇阻滯，呢單收購最後會唔會告吹？
大華繼顯執行董事梁偉源認為，監管機構唔係針對螞蟻，反而係市場反應太激烈，收購消息一出，刺激耀才股價狂飆幾倍，所以引起監管機構關注。至於會唔會禁止呢單收購，Steven相信監管機構只係想令市場情緒降溫，未至於會出手阻止呢單交易。
