【now.com財經】早前，有報道指，有謝瑞麟(00417)股東喺今個星期一(18日)將股票由滙豐銀行轉倉至時富證券，市值逾1億元，佔比逾72%，唔知係咪因為呢個報道，令集團股價連日喪炒，過去兩日一度累升逾2倍，謝瑞麟股價今日(21日)繼續抽升。
集團昨日(20日)發過聲明，話唔知道股價異動原因，又指公司業務營運正常，但呢個聲明無阻股價升勢，今日一度再炒高逾51%，高見2.11元。
市場其中一個猜測係市值僅4.74億元嘅謝瑞麟有可能賣盤，事實上，自京東集團(09618)收購佳寶後，因為市場玩「尋寶遊戲」，令多隻零售股先後被掃高，都係源於一個賣盤憧憬，包括阿信屋母公司CEC國際控股(00759)及優品360(02360)等，可能投資者嘅「視線」近日轉移至珠寶金飾股，帶挈「細細粒」嘅謝瑞麟連日喪炒。
