【now.com財經】雖然最新一批銀色債券保底息略低過以往，但仍有3.85厘，對一般為自己資金搵投資出路嘅「老友記」嚟講，吸引力似乎仍大過造定存，另有部分市民認為，買股票嘅回報比造定存更吸引。本地銀行為打好呢場「搶錢戰」，港元定期存款不斷「加息」，單係今日(26日)已經有約9家銀行出手。
其中，滙豐銀行單係今個星期已連環出招，繼周二(23日)加一般客戶定存息後，今日再將全線客戶3個月及6個月定存息加至2.3厘。
中銀香港(02388)及渣打銀行亦將一般客戶6個月定存息加至2.3厘，硬撼滙豐。至於恒生銀行(00011)亦加咗一般客戶3個月定存息。
至於數字銀行就更進取，港元定存息出現久違嘅3字頭。
Mox Bank就出現「短加長減」嘅情況，最近將1個月定存息由1厘大幅加至3厘，但同時將36個月及48個月定存息，由2.8厘減到2.3厘。此外，WeLab Bank最新將12個月定存息加至3厘。
