【now.com財經】大家都知可再生能源有助應對氣候變化，但香港地少人多，裝太陽能板要有足夠空間，要自製風能難度就更高，一般市民如果想支持環保，但又唔可以自製可再生能源，咁有咩辦法？你可以考慮購買「可再生能源證書」。
首先，你要決定購買幾多度可再生能源產生嘅電，電力公司就會向你發送一將印有你姓名和購買電量嘅電子證書。證書上顯示嘅每一度電，都係電力公司生產或購入，由太陽能、風能和堆填區沼氣項目所產生嘅電。舉例你買咗100度電，就可以抵銷用電上嘅碳排放。如果你係商業客戶，更可以申領可再生能源電力相關嘅環境權益。
配合現今環保低碳世代，電力公司推出咗唔同形式嘅「可再生能源證書」。好似今年就有汽車品牌，為旗下嘅電動車購買中電「可再生能源證書」。喺交車俾車主前，呢啲電動車會以可再生能源電力首次充電，佢地嘅車尾玻璃仲會貼上特別貼紙識別。車主亦會獲發一張印有車型、車牌號碼、車輛耗電量和中電「可再生能源證書」號碼嘅證書。
另外，電力公司亦為一間香港嘅數據中心，推出「中電每小時可再生能源證書」，用新界西堆填區嘅堆填沼氣發電項目所產生嘅電，抵銷呢間數據中心每個鐘嘅用電量，實踐轉廢為能，減少碳排放。
「可再生能源證書」嘅入場費並唔貴，只需港幣50蚊就可以購買100度可再生能源電。大家快啲行動，支持本地可再生能源，一齊減低碳排放。
鍾練仁
