標籤:
【輪證下半Part】收工
【輪證】 2022/09/30 14:37
【now.com財經】出面啲雨一直落無停過，黃雨發出咗成兩個鐘都未停，但今日恒指反而有啲似停雨，中午收市都只係跌11點，半日見17,154點。
今日個市似乎有啲靜，當然亦都可能過山車未上滿客啦，依家1點9分，指數最低見過17,016點，爭16點都仲未穿到17,000點呢個位，都明嘅，雖然呢度牛證都時得返好少，剩低嘅可能係見呢個點數都跌唔穿而少少地一注博之後再上，呢啲嘢都係有大博大架咋。
今日喺呢度無任何動作出過，只係睇咗個牛熊證街貨圖嘅布局有唔同；但喺作戰室就出咗兩注好倉，第一注敗北離場，都Feel到自己又開始黑氣，本來諗住停一停，忍一忍啦，事關往往追進個市唔放其實等於唔放過自己，隨時連早幾日係咁出淡倉嘅收獲都要嘔返出嚟，咁就麻煩。但實在手痕忍唔住再出第二次好倉，結果依家困住咗喺個「三角形」度...
唉...算啦，作戰室繼續為咗一兩格奮鬥；呢度準備今個月收爐，稍後【月度報告】公布今個月喺呢個欄裡面推介過而成功買賣嘅總結啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
作戰室入口：https://www.patreon.com/cbbcwar
專頁：https://bit.ly/3uixP4Y
