【股市脈搏】春江鴨放榜前出動？南方錳業大冧市4連升

【Now財經台】南方錳業(01091)今日成冧市奇葩，今早高開近6%後，一直keep住有得升，雖然港股午後跌幅擴大，但南方錳業冇受影響之餘，反而仲升多咗，升幅一度擴大至逾32%，高見1.13元，暫時係三大升幅港股之一，而成交股數逾2億股，較過去100日同時段平均激增23倍。

南方錳業成交連續3個交易日異動，而股價就暫時連升第4日，累升約1倍，但公司噚晚話，經合理查詢後，唔知道成交異動及股價大升嘅原因。

南方錳業股價呢幾日嘅表現，比4月發盈喜時更興奮，值得留意係，公司8月20日會出中期業績，睇下之後有冇消息跟尾。