【名家給力場】第一上海「伸手」攞嚟倒落海？

【Now財經台】第一上海(00227)上星期五公布，擬按5供1比例供股集資，每股0.27元，集資約7660萬元，將會全數投入醫療及保健服務。第一上海最少1年冇集過資，加上去年蝕多咗，更重要係醫療及保健業務嘅營業額，佔整體比例極小，小股東供唔供好？

《香港股票財技密碼》作者梁杰文指，第一上海嘅醫保業務年年蝕錢，但供股集資嘅錢，又用嚟投資表現最差、賺唔到錢嘅業務，對公司嘅營運幫助唔大。

Mike又話，公司供股時間、業務前景唔係咁理想，小股東未必會參與，如果第一上海股價之後繼續跌，供股規模亦會因配售唔到股份畀獨立承配人而縮水，集資金額就唔達標，小股東參與供股，或者投資呢隻股份都應該諗清楚。