【Now財經台】和記電訊香港(00215)下晝突然成交激增，尾市一度衝上到1.36元，並以近全日高位1.34元收市，升近9%。
集團冇咩消息，而最近電訊商頻譜出現洗牌，和記香港更係落後，相信資金炒作同派息憧憬有關。
和電曾喺中期業績前曾預告提升派息比率至100%，同派中期特別息，刺激股價一度炒上約1.6元。股價一派完息就見光回落，但仍高過2月公布提高派息時水平。
不過，公司喺中期業績講過，直至股東應佔經常性溢利超過3.61億，先會提升到百分百派息比率；而下年審視現金狀況後，再考慮派發特別股息。
換言之，下年2月嘅全年業績理應唔會再派特別息。投資者要留意資金未必一路炒到下份業績，股價可能會好波動。
