【Now財經台】載通(00062)今日埋單雖然只跌約1%，收報12.72元，不過今日下試咗6年低位，而且見到有沽壓，主動沽盤接近80%，跌勢亦有成交配合，成交股數比過去100日同時段平均多3倍。
載通係一間經營包括九巴在內嘅巴士營運商。載通股價弱勢同業務轉弱好有關係，公司營業額由2019年全年逾80億到舊年得返60億左右，睇埋上半年業績，如果唔計政府補貼，九巴就要蝕錢。近日政府宣布，立法會換屆選舉唔使畀錢搭九巴，但要公司自行負擔使費，對載通嚟講其實係負面消息。
根據月線圖，載通已經失咗250月線，即約13.1元，下個支持位已經要跌穿10元。作為公用股，載通嘅股息率連4%都冇，難怪股價低都無咩承接。
