【股市脈搏】南方錳業又畀100天線頂住

【Now財經台】港股市況有幾差，除咗喺成交睇到，升跌比例係另一個指標，今日全日有近千隻股份要跌，而上升股份有600幾隻，唔少係細價股或市值較細嘅股份，包括南方錳業(01091)。

南方錳業今朝高開逾2.8%後，繼續有買盤湧入，一度高見1.19元，大升逾14%，其後升幅收窄，收市報1.13元，升近9%，成交股數係近兩個月最多。

南方錳業股價橫行咗近兩個月，今日再次嘗試突破，不過，今日即市高位同月初一樣，畀100天線頂住喺1.2元水平，公司市值只得30幾億，股價較易被炒起，但要注意南方錳業股價有時單日波幅好大。