【股市脈搏】想買旺旺睇定啲先

【Now財經台】中國旺旺(00151)今朝低開1%後，沽盤湧入，半日急挫超過7%，午後跌勢加劇，跌幅擴至雙位數，低見7.31元，成交股數逾2000萬股，較過去100日同時段平均增加超過4倍。

中國旺旺去年11月尾同分析員開會已披露今個月22日會加價，為4年以來首次。大行近日繼續看好，瑞信最新升左目標價25%至7.9元，花旗給予「買入」評級，目標價睇9.21元，高盛都將目標價上調13%，睇6.1元。

技術上，股價早在去年8月下旬開車，至前日升至7年高位8.44元，累升69%，呢兩日逆市下跌，上午失守10天線，下午連20天線都失埋，今次加價未反映在最新業績上，但過去幾個月升勢，可能已經提早反映加價利好，加上過去旺旺多數在農曆新年前後都會有炒作，暫時睇實條20天線，如果企得返上去先再考慮部署。