【Now財經台】內地舊年12月零售數據遠差過市場預期，按年升幅放緩至只有1.7%，因此，當局推出振興消費方案，翻炒「家電下鄉」概念，但家電股冇咩聲氣。
同時，摩根士丹利最新報告建議挑選內需型家電股，指2020與2021年期間出口型家電股已出現過度消費現象，喺高基數效應下，估計今年家電出口銷售增長放緩，甚至有機會倒退。
比較幾隻家電股截至去年中嘅區域收入比重，VESYNC(02148)、JS環球生活(01691)與海爾智家(06690)喺北美地區的收入佔比均超過一半，屬出口型家電股。不過，uSmart盈立證券研究部總監陳偉聰就認為，唔使睇得咁淡，公司市佔率高嘅話一樣可以有增長，例如JS環球旗下品牌喺上年「黑色星期五」就賣得唔錯。
反而主要內銷嘅創維集團(00751)就唔係Jason首選，雖然跑贏同業兼4連升，但可能係回購效應，同埋分拆智能家電業務上A股嘅消息帶動。
