【財經TOP SEARCH】龍光復牌後都係企唔穩？

【Now財經台】截至早上11時，1小時内《彭博》用戶關注度上升最多的港股依次為龍光集團(03380)、華潤置地(01109)、恒基地產(00012)、世茂集團(00813)及中國平安(02318)。

龍光停牌3個幾月後，終於出2021年全年業績並復牌，除咗舊年賺少23%，業績核數師亦對計息銀行及借款中流動資金及某啲非限制性現金等數字發表保留意見，雖然公司話旗下有12隻境內債券完成延期，但股份復牌後仍要追跌，現階段點判斷公司違約及破產風險？

獨立股評人譚智樂指，綜觀過去一年，好多出事嘅內房都係突然公開有表外負債，除非公司實牙實齒表示還到錢，否則通常都會延期還債，投資者應該等內地樓市有回暖跡象，再諗有冇機會撈底，否則唔好掂內房股。

Arnold認為，龍光股價短期內未必有起色，有貨嘅投資者要考慮自己嘅風險承受能力，如果未能承受跌市，就視乎自己能力減持，唔好溝貨。