【財經TOP SEARCH】國企出手救內房另有盤算？

【Now財經台】截至早上11時止，1小時內《彭博》用戶關注度上升最多港股，依次為合景泰富集團(01813)、富力地產(02777)、東方海外國際(00316)、騰訊控股(00700)、世茂房地產(00813)。

內房股今日普遍有反彈，包括業績較差嘅合景泰富，而富力及仍然停牌嘅世茂，分別同國企有合作或交易，其中世茂向華潤置地(01109)出售北京地皮，唔難想像市場會解讀為國企開始出手救內房？

椽盛資本投資總監曾永堅指，市場一直有消息指，同房企相關嘅國企出手併購有財務壓力嘅民營房企資產，加上國務院總理李克強推出嘅19項政策，其中一個領域係因應一城一策主題下支持內房市場，因此，市場逐漸解讀成中央陸續加強指導國營企業幫助解決內房危機問題，不過，其實國企唔係純粹幫手咁簡單，當中亦有商業角度嘅考慮，即幫咗內房之後有咩好處，而財務較穩健企業收購有財務壓力嘅民企做法，意味市場汰弱留強嘅情況陸續開始。