【Now財經台】手機設備股通達集團(00698)今日升得唔錯，公司噚日傍晚出通告，以近4億元出售製造汽車內飾部業務70%權益，估計稅前賺3億元，完成交易後，通達仍持有呢間公司30%，呢間附屬公司市值9.7億元，作價相當於市值近40%，呢單交易對通達嚟講有冇著數？股東應唔應該支持？
《香港股票財技密碼》作者梁杰文指，呢單交易嘅PE約21倍，都算係合理，但附屬公司嘅電動車電池鋁部件業務剛上軌道，又同龍頭車廠有合作，所以對通達出售業務嘅決定有少少質疑，加上交易其中1.35億元以現金支付，餘下就要同通達借錢找數，反映買家冇乜實力。
Mike認為，通達今次將慢慢做出成績嘅業務賣走，將資源集中造手機外殼業務，佢估計股東未必會贊成，但小股東始終無辦法否定管理層嘅決策。
