【Now財經台】浙江世寶(01057)今朝平開後，一度跌3.7%，但之後掉頭向上，午後升幅急速擴大，最多升11%，高見1.76元，收市升幅收窄至4.4%，報1.65元。
中信証券上星期出咗份報告，指內地係智能座艙、自動駕駛、智能底盤等方面，有潛力成為具全球競爭力嘅零部件龍頭企業，內地係成本、供應穩定性方面都有優勢。浙江世寶開發嘅智能轉向系統，依家處於開發、試製同測試階段，仍未大量生產，而公司係中期報告披露部分在建項目，雖然項目未量產，但近期市場多咗車企加入智能化，公司係呢方面嘅投入都會被睇高一線。
浙江世寶股價8月跌穿100天線後，一度收復返，但最終都係企唔穩，今日跟隨A股有炒作，但升穿100天線後獲利盤湧現，短線都係以企穩100天線做目標。
