【Now財經台】藍籌藥股石藥集團(01093)中午派咗成績表，雖然去年純利增速較去年首3季快，但整體收入、兩大主業成藥及原料產品收入，增速都比首3季慢，毛利率更按季跌6.3%，按年亦跌3.9%，石藥呢份成績表係咪只可以話平平穩穩？早前，旗艦產品「恩必普」被納入內地「帶量採購」，因而要大幅減價，係咪毛利率下跌嘅原因？
英皇證券研究部總監陳錦興指，石藥處於增長放緩階段，疫情前收入增長近30%，2021年僅增長12%，去年再放慢至11%，導致近年股價疲弱，亦難獲得較高估值。佢又話，今次業績亮點係派息增加16%，但成藥收入增速放慢，似乎滿足唔到投資者對集團研發新藥潛力嘅期望，整體而言，業績只係平穩，所以股價午後衝一衝就打回原形。
Stanley又估計，石藥收入增長8%，「恩必普」應佔5%至6%，由於成藥收入佔比高，所以增長放慢一定會拖累毛利率。此外，新一批「帶量採購」上月生效，呢方面要喺嚟緊嘅業績先睇到有咩影響，但相信毛利率會持續受壓。
