【Now財經台】中午休市時《路透》傳出中國移動(00941)正研究收購及私有化香港寬頻(01310)。香港寬頻半日升逾3%，午後升幅擴大見逾半年高位6.88元，更曾升穿250天線。
香港寬頻作為電訊股，收入、派息穩定，而且現金流強勁，一向係機構投資者垂青對象，過去一年多次傳出有基金或機構洽購，包括私募基金太盟投資集團、I Squared Capital等，股價於呢一輪洽購消息中都企穩6蚊附近。
最新傳出中移動有意洽購，資金湧入令股價突破橫行格局，反映再多個買家競購，市場憧憬香港寬頻有機會以更好的估值及作價賣盤，亦可能反映，市場覺得中移動買得成嘅機會比其他買家高，始終「中字頭」機構進駐香港市場相當合理。
本地電訊市場發展成熟，增長空間有限，香港寬頻嘅主要股東都係加拿大退休基金、私募基金TPG、新加坡投資公司等長線投資者，只要價錢吸引，相信賣盤隨時成事。
