【Now財經台】出業績後受壓的香港寬頻(01310)今朝裂口低開5%，一度跌12%，低見5.22元。
股價反應咁大，相信因為派息大減，中期息派20仙，按年大減一半，但其實派息比率相當於經調整自由現金流的80%，高於公司承諾嘅75%。昨日管理層在業績會上提到，利率上升，希望留多啲資金，用作還債減少利息開支，又可以做更多主營業務投資，相信都令投資者擔心未來派息會唔會更改或者再減少。
股價今日一口氣失晒所有移動平均線，暫時喺最低嗰條100天線水平，即5.46元水平爭持，實收中期息少咗，加上賣盤憧憬落空嘅雙重打擊下，相信股價會繼續喺低位上落。
