【Now財經台】截至早上11時止，1小時內《彭博》用戶關注度上升最多港股，依次為騰訊控股(00700)、比亞迪股份(01211)、龍湖集團(00960)、中國平安(02318)、碧桂園(02007)。
內險股已派晒季績，多家純利升幅都唔錯，新業務價值亦見底回升，內險股之前追返上嚟，今日又回返，依家內險股市盈率(PE)及市帳率(PB)貴唔貴？
第一上海首席策略師葉尚志指，內險股業績唔錯，相信最差情況已過，2020至2022年受疫情影響，其中，平保主攻人壽保險，經紀同客人見面少咗，對壽險生意嘅影響較中國財險(02328)大，復常後，壽險投保人數增加，保費收入亦隨之增加。
佢又話，A股投資收益好咗，加上過往大部分險企講求穩陣，固定收益投資如債券等，過去兩年表現差，但依家內房債明顯喘定返，不過，內險PE及PB唔會即時升得好勁，最好有足夠save margin會好啲。
