【Now財經台】海爾智家(06690)之前已派咗首季成績表，除咗幾個大數外，值得留意係，季度毛利率仍未重返30%水平，睇返往績，海爾智家第1季毛利率都係偏低，要之後3季先回升至30%以上，而首季經營利潤主要靠投資收益及公允價值變動收益帶動，係咪反映家電股基本面增長動力仍然疲弱？
紅蟻資本投資總監李澤銘指，內房3月及4月銷售有改善，但只係受惠於低基數，而家電股銷售主要靠新屋入伙，依家房地產市場仍然疲弱，喺呢個背景下，市場對家電股內地增長前景唔會好樂觀，雖然海爾智家有出口業務，如北美及歐洲，但亦受當地消費疲弱影響，估計未來幾個季度可以出現強勁復甦，都好難抱太大期望。
股價方面，「五一黃金周」消費旺季過去，加上內地冇再推出鼓勵家電消費政策，海爾智家股價係咪都好難睇好？Alan就話，股價依家同4月低位23.15元已經好近，可能會有少少支持，但要跌穿都唔難，不過，海爾智家估值唔貴，對股價亦有一定支撐作用，但由於冇國策支持，可能要喺低位一個區間盤整一段時間，即22元至24元。
