【Now財經台】雖然港股上半年走勢麻麻，但單睇中型股今季表現，恒生綜合中型股指數竟然有得升，其中，中興通訊(00763)係第2季表現最佳成分股，股價第2季大升36%，單計6月亦累升約30%。
中興又趕上人工智能(AI)熱潮，噚日發布全球首款針對零售客嘅「GPT無線AR智能眼鏡」。集團指，呢款眼鏡引入生成式AI技術，可協助佩戴者「脫稿演講」，仲可以實時翻譯語音信息，並支援電話、導航、聽歌等多種功能，究竟中興後市有冇機會借消息再炒多陣？
第一上海首席策略師葉尚志認為，中小型股上半年經歷重重跌浪後，近期股價已見到階段性底部，反而比投資大型股穩陣。
佢續指，中興嘅AR眼鏡食正AI概念，加上集團有盈利基礎，應該有能力繼續「燒錢」研發，增加投資者對業務前景嘅信心。
