【Now財經台】東方甄選(01797)於上周五(25日)公布截止5月底止全年業績，過去1年，公司成功由教育股轉型至直播帶貨，全年轉虧為盈，轉賺9.7億人仔。
單睇下半年度業績，直播電商業務嘅商品交易總額(GMV)按半年計增長8%至52億人仔，不過，明明商品平均單價提升咗，但毛利卻要跌，下半年微跌2%，最終出現收入升、純利跌嘅情況。
獨立股評人沈慶洪認為，東方甄選GMV錄得增長，其中，自營品牌佔GMV快速擴大至三分之一，作為公司轉型後首份全年業績已交到貨。然而，公司喺轉型過程中要面對好多因素，例如揾客源、擴充團隊、跟其他平台建立合作關係等，因此，轉型前期嘅收入、純利增速，雖然會畀推廣開支或優惠計劃拖慢，但唔會影響未來發展。
東方甄選股價今日同大市背馳，恒生指數高開低走，但集團股價愈升愈有，最終收報45.4元，升5%。Patrick指出，近排東方甄選股價慢慢突破多個阻力位，走勢呈向上型態，估計短期會上試49至51元，即今年2月嘅平台區。
