【now.com財經】呢幾日個市真係悶到發慌，見恒指日線圖呢幾日Keep住得嗰唔夠300點嘅範圍上落，唔止躺平咁簡單，直情係摺。依家9點19分，差不多完U準備正式開市，八掛下個月線圖，見到年初至今指數喺月線圖上面完全受制於保歷加通道中軸，Slow STC(14,3)兩線亦九個月都Keep住喺中軸水平，只係見保歷加通道口慢慢收窄，有限制住指數再上落空間；係呀，限到就嚟唔郁架啦。
終於等到完U，恒指開市報17,795點，跌89點，呢口價算是打破咗之前嘅178xx至1800x點嘅「長方形」悶局，同時呢口價亦都將牛證第一層街貨17,800至17,899點全數收回，呢度有相當於698張期指，至於榮升為最貼價牛證街貨層嘅17,700至17,799點，都有629張期指。望望鐘見依家9點34分，指數暫時最低做過17,731點，即係話呢一層嘅牛證生命值都只係得返31點，遲早玩完。
作戰室往往喺完U後、正式開市前嗰10分鐘擬定第一注嘅出市策略，今日亦都唔例外，淡倉一早Standby，更有戰友噚日已經準備好晒，睇死港女有跌無賠，不過通常呢一注我哋都會預定爬格仔用。
都真係以為指數會向下直落殺街貨，好歹今日都已經21號，下個星期又期結+中秋+國慶長假期，為咗放假拿拿聲爬多兩啖砌夠數完埋今個月，順便做埋Q3季結添。但偏偏又見低開高走，莫非佢想爬返上17,800點樓上、入返嗰區橫位繼續瞓？咁近牛證街貨，17,700至17,799點如果食得晒，咁又有1,200幾張期指袋袋平安，開心過夜繽紛啦，下話？
果然無諗錯，10點未夠指數兩度升上去17,800點樓上，但可惜佢企唔穩，最終只有條上影線喺度，作為老散嘅一份子，絕對欣賞好友呢兩條上影線嘅勇於嘗試，淡友喺17,800點成功落閘後，指數向下落見17,698點，用2點全數吞埋第二層，即係今日用咗半個鐘吞咗1,327張指街貨。
恒指熊(54279)，收回價18,150點，同現價有逾360點差距，約44偯槓桿夠做Day Trade，以依家情況指數已殺兩層牛證街貨，佢係有可能出現低波幅Swing Trade運行至4點，但既然17,800點暫時做咗阻力的話，就試下逢高開淡，反正目前指數仍然靠近牛證街貨層。
多謝Tiger Brokers送嘅中秋禮盒。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
