【Now財經台】騰訊控股(00700)有份投資嘅途虎養車(09690)明日(26日)首掛，集團以下限定價，一手中籤率100%，集資淨額近11億元。近期有唔少新股掛牌，但未有1隻特別搶眼，途虎養車又值唔值得期待？
博威環球證券金融首席分析師聶振邦認為，途虎主業係保養維修，佔整體業務逾92%，廣告業務就佔整體7%至8%，而同內地消費行情掛鈎程度亦較高。依家內地經濟環境較去年疫情期間好轉咗，所以途虎業績都有改善，呢個因素主要反映喺招股價，所以股價短期表現嘅關注點，會落喺股份嘅分布情況，而招股反應嘅參考性會比業績大。
聶Sir又指，途虎招股規模逾4200萬股，超出原本約4060萬股，集團話行使咗部分調整權，導致招股規模變大，配售部分嘅超額認購上限亦相應提高15%，依家大戶持貨近80%，股權高度集中，相信對上市初期股價表現會有幫助，但都要留意明日上市後恒指嘅表現，若恒指可以反彈100至200點，途虎股價有機會上望29元或以上水平。
