【Now財經台】電動車廠龍頭Tesla 9月仲喺中國打價格戰，旗下Model S及Model X車型多次減價，但另一邊廂Model Y及Model 3車就加價，10月底起計，唔夠1個月已經加價4次。Tesla解釋係因為成本上漲，大和證券就解讀為係需求旺季下平衡盈利及市佔率嘅策略。
耀才證券研究部總監植耀輝引述分析指，Tesla年內仍有機會再加多次。佢續指，公司之前減價促銷嘅策略成功谷高旗下汽車銷量，但犧牲咗毛利，公司第3季毛利率僅約18%，屬4年來最低水平。
此外，大和睇好Tesla加價會利好內地車企今季盈利再提升，但係其他車企有冇條件跟住加價呢？
Stanley認為，Tesla加價可能減輕內地其他新能源車廠減價促銷嘅壓力，但隨住越來越多公司入局想要分一杯羹，比如小米集團(1810)都撈過界，將於明年上半年推出首款電動車，行內競爭只會愈趨激烈，相信價格戰唔係咁容易完結，而最近先虧轉盈嘅理想汽車(02015)又降低旗艦車型L7嘅售價。
